د نورستان د غمیزې په تړاو د ملي محور د خواخوږۍ پیغام
بسم الله الرحمن الرحیم
په ډېرې خواشینۍ سره مو د نورستان ولایت د وروستیو سختو سېلابونو او طبیعي پېښو له امله د هېوادوالو د شهادت، ټپي کېدو، ورکېدو او پراخو مالي زیانونو خبر ترلاسه کړ.
ملي محور د دې دردونکې غمیزې له امله د شهیدانو درنو کورنیو، د نورستان له شریف او صبرناک ولس، او د افغانستان له ټولو خلکو سره خپله ژوره خواخوږي او خواشیني څرګندوي.
د لوی خدای (ج) له درباره شهیدانو ته د فردوس جنت، ټپیانو ته د بشپړې روغتیا او د غمجنو کورنیو لپاره د جمیل صبر غوښتنه کوو.
دغه غمیزه یو ځل بیا موږ ته را یادوي چې د طبیعي پېښو پر وړاندې د مبارزې لپاره، بشپړ چمتووالي، د ژغورنې د ظرفیتونو پیاوړتیا او د زیانمنو سیمو د بنسټیزو اړتیاوو پوره کولو لپاره جدي او همغږو هڅو ته اړتيا ده.
موږ له ټولو ملي او بشري مرستندویه بنسټونو، سوداګرو، خیریه مؤسسو او هېوادوالو څخه غوښتنه کوو چې د نورستان له زیانمنو کورنیو سره خپلې بېړنۍ بشري مرستې و نه سپموي او په دې سختو شېبو کې د هغوی لاسنیوی وکړي.
الله تعالی دې زموږ ګران هېواد له هر ډول آفتونو او غمیزو وساتي، او زموږ ولس ته دي یووالی، امنیت او سوکالي په برخه کړي.
ملي محور