د ملي مرکې غونډه په والسال کې
والسال، برېتانیا – د ۲۰۲۵ د سپټمبر ۲۸مه، یکشنبه – نږدې ۱۰۰ تنه د افغان کډوالو استازي، د هغوی ملګري او د ټولنې ملاتړي د افغان ټولنیز او خیریه مرکز په تالار کې د ملي مرکې په ټغر سره راټول شول. دا مهمه غونډه د نړیوالو سلا مشورو د یوې پراخې لړۍ برخه وه چې موخه یې د سولې، یووالي او پرمختګ لپاره د یو ټولشموله، د افغانانو په مالکیت ملي بهیر رامنځته کول دي.
غونډه د قرآن کریم د مبارکو آیتونو په تلاوت پیل شوه چې د یووالي او روحانیت فضا یې رامنځته کړه. حاجي صب ممتاز ستارزی په پرانیستونکو خبرو کې د باور، یووالي او ګډ لید د پیاوړتیا پر اهمیت ټینګار وکړ.
وروسته، ښاغلي فهیم ځاځی د افغان ټولنیز او خیریه مرکز مشر، ټولو ګډونوالو ته ښه راغلاست ووایه او د ټولنې د خدمتونو په اړه معلومات وړاندې کړل. ورپسې، ښاغلي حنیف الکوزي د ورځې پروګرام او اجنډا تشریح کړه. د دوی له خبرو وروسته، ډاکټر شریف ظریف د ملي مرکې موخې، جوړښت او د پروسې تمې او احتمالي پایلې تشریح کړې. هغه ټینګار وکړ چې دا بهیر باید شفاف، ټولشموله او د افغانانو د واقعي تجربو پر بنسټ ولاړ وي، څو د عدالت، سولې او ګډ ملي لید پر لور عملي پرمختګ تضمین کړي.
وروستۍ برخې کې د ډاکټر فرهاد جلال، ډاکټر سمیع جوره، ډاکټر ایاز صافي او آغلې لینا وحیدي په مدیریت یو لړ ژور بحثونه ترسره شول. د بحثونو موضوعات د ملي یووالي، سولې، دوامدار پرمختګ او د افغان کډوالو د رول او ظرفیتونو پر اهمیت راڅرخېده. ګډونوالو ټینګار وکړ چې ملي مرکه باید د خلکو په لارښوونه پرمخ ولاړ شي، نه یوازې د نخبهګانو په لاس، او د ښځو، ځوانانو او محرومو ټولنو غږونه باید په کې واورېدل شي.
په نورو ناستو کې د افغان کډوالو د ژوند تجربو او ستونزو ته ځانګړې پاملرنه وشوه. په والسال کې ګډونوالو د افغان ټولنو ترمنځ د تیتپرک والي، د پخوانیو سیاسي بهیرونو پر وړاندې د باور د کمزورتیا او د همکارۍ د اړتیا یادونه وکړه. ګډونوالو ټینګار وکړ چې که یووالی او همغږي وي، د افغانانو وړتیاوې او سرچینې کولی شي د افغانستان د بیا رغونې لپاره مهم او اغېزناک رول ولوبوي.
د غونډی په وروستیو برخو کې خبرې اترې د عملي ګامونو پر لور ولاړې. ګډونوالو د اړیکو د خلا ډکولو، د سیمهییزو او نړیوالو هڅو د همغږۍ او د بهیر د روان ساتلو پر اړتیا ټینګار وکړ. وړاندیزونه د سیمهییزو کاري ډلو جوړول، د اړیکو د لارو ښه کول او د بېطرفه پلټفورمونو رامنځته کول شامل ول.
غونډه د یو روښانه او هدفمند مسیر په ټاکلو پای ته ورسېده. د ناستې پایلې به د ملي مرکې پراخ بهیر ته وړاندې شي او د نړۍ له نورو غونډو سره به یو ځای د راتلونکي لپاره بنسټیز رول ولوبوي. ګډونوالو په ګډه د والسال سیمهییزې کمېټې د جوړېدو ملاتړ وکړ، څو خبرې اترې دوام وکړي او د والسال د افغانانو غږونه په ملي کچه واورېدل شي.
غونډه د هیلې او ژمنتیا په فضا کې پای ته ورسېده. ګډونوالو یو ځل بیا خپل تعهد څرګند کړ چې د ټولشمولو خبرو، عدالت او د افغانانو په مالکیت حل لارو له لارې به د یو سولهییز، یو موټي او پرمختللي افغانستان لپاره هڅې کوي.
.